الثلاثاء، 25 نوفمبر 2014

خلف الكواليس (مسرحية)






 مسرحية خلف الكواليس

تأليف  : طلال محمود
                                                        

 ملاحظة : كتبت هذه المسرحية في البدايات و كانت محاولة لم تعرض على خشبة المسرح إلى اليوم .. أتحدث في هذا العمل عن فئة معينة في المسرح (مهمشين) إلى يومنا هذا 


الشخصيات  :

عمر  عضو في الفرقة
فهد عضو في الفرقة
هديل عضوة في الفرقة
مسعود عضو في الفرقة
ياسر  قائد الفرقة و مؤسسها

صالح  عريف الحفل
حميد  رئيس قسم  العلاقات العامة







البداية

الجو العام : المكان عبارة عن مكان ما خلف مسرح او قاعة بحيث نجد الاكسسوارات الخاصة بما يخص القاعة كبعض كشافات الاضاءة و بالاضافة الى خشبة التقديم و بعض الاقمشة المتبقية  و ادوات الزينة و في جهة اخرى مجموعة صناديق و سلالم .
نسمع الى موسيقى صاخبة و تتبدل الموسيقى و تدخل اغنية تلو الاخرى و كأن هناك من يتدرب او يجرب السماعات الخاصة بالمكان و في تلك الاثناء يدخل عمر شاب في بداية العشرينيات و كأنه هارب من الازعاج و هو يتكلم بالهاتف النقال 

عمر : يا امي انا الحين وين و انتي وين ؟ ما اقدر اتصرف بسرعة .. انا ما اقدر اضرب الارض و احفر و اطلع ذهب ..الحين شو ياب طاري الدوام  .. اللي يسمع الحين اول ما بقدم اوراقي على طول بيوافقون و بيعطوني معاش . .بحاول صدقيني بحاول  و قولي حق محمد لا يضغط علي زيادة خليه يرحمني شوي  .. ( يسمع صوت خطوات اتية من الخلف ) امي اظني وصلوا الشباب و بحاول ادبر شي اليوم .. مع السلامة
يدخل فهد ينظر الى عمر الذي يبدو عليه الضيق فيقول له
فهد : هاه .. شو اكيد ضايقتك و قالت لك حبيبي انا زعلانة منك و انا مابي اكلمك و انا
عمر ( مقاطعا ) : يا فهد انا مالي نفس هالسوالف  ..
فهد : اوه .. اوه .. عمر ماله نفس ؟ انت اكثر انسان لك نفس في كل شي .. لك نفس تاكل تشرب تلبس تغني و ترقص  بعد .. شو ياينك اليوم ؟
عمر : ممكن اعرف وين باقي الشباب ليش متأخرين ؟ مب المفروض نتجمع من ساعة ليش جي .. شو تبون الريال يقول عنا  .. مب ملتزمين ؟ مب المفروض الحين نسوي بروفة انا للحين مب عارف شو القفلة
فهد : انت شو ياينك اليوم مستوي فلفل .. هدي شوي يا عمر نحن المفروض نكون مرتاحين فرفش يا عم .. الدنيا الا هي يومين  
عمر : صدقني انت اللي مافيك احساس صدق اللي يقول اللي ايديه بالثلج مب مثل اللي ايديه بالنار
فهد : يعني الحين انت قايل معلومة خطيرة .. محد يعرفها تصدق !! تستاهل جائزة نوبل في الفيزياء .. اللي ايديه في الثلج مب مثل اللي ايديه في النار ..
عمر : شوف اذا بتم اليوم تتعامل معاي بهاي الطريقة انا ساير البيت
فهد : سير حد ماسكنك .. ما نبا نخرب اليوم بنفسية خايسة مثلك
ينظر اليه عمر بغضب يتردد في التهجم عليه ثم يتجه للخارج في تلك الاثناء يدخل البقية و يمسكه ياسر
ياسر : هاه وين شارد .. رد ورانا شغل و نحن مستعجلين
عمر : خوز عني  .. ياي اخر الناس و يقول مستعجلين و ثاني شي انا مابا اتم في مكان هالانسان موجود فيه  .. لا احساس ولا ضمير 
فهد : الحين بدينا بحوارات المسلسلات
عمر : شوف ترى ماسك عمري انا لا تخليني امد ايدي عليك
ياسر : ايه انت وياه .. احترموني انا اللي جدامكم ...
هديل : خير شباب شو مستوي ؟
مسعود : انا متأكد ان فهود هو البادي
فهد : مسعود ...
عمر : يلا بعد ضارب مسعود ... يوم اقول لكم هالانسان ما عنده احساس
ياسر : يا جماعة انتو شو فيكم اليوم ؟؟؟ تبون نلغي العرض انا حاضر بس كل واحد فيكم يتحمل الخساير  .. لا تنسون كل واحد فيكم دفع من جيبه شوي حق البروفات  و اجتماعاتنا
يصمت الجميع يجلس عمر بجوار الصناديق بينما يجلس فهد في الطرف الاخر و بجواره ياسر ينهض ياسر و ينظر لهما بضيق و يتجه الى زاوية لوحده لحظات ثم تسمع هديل صوت جلبة و حركة في الخلف و تقول  
هديل :شكلهم وصلوا  .. يا جماعة الخير خلونا نسوي بروفة سريعة للعرض و نخلص .. كل واحد ياخذ نصيبه و يروح بيتهم و عقبها يحلها ألف حلاَل بس لا تخربون هالليلة .. انا علي مصاريف .
مسعود : شوف ياسر الوقت يمر و نحن ما قدرنا نسوي بروفة كاملة .. و الحين جدامنا عرض و لازم نقدم لهم شي يليق باسم المجموعة

هديل : صدق نحن كل بروفاتنا عرية ( عرجاء ) مافي بروفة اكتملت
ياسر : لا تذكروني بسالفة البروفات .. هاي حالة ؟ يعني الحين مسرحية .. اي مسرحية .. اسكتش مدته  20 دقيقة ما قدرنا نسوي بروفة كاملة .. كل يوم في مكان و كأن قطوة شايلة عيالها من مكان لمكان .. يوم في ميلسكم يا مسعود و يوم نتحاطط و نحجز قاعة اجتماعات في فندق ولا نروح المسرح .
عمر : و هناك طبعا محد يسوي لنا سالفة .. ربعنا اللي هم ربعنا يوم نطلب منهم وقت للبروفة و نبا القاعة كل واحد يحيز بوزه و كأني طالب من حلالهم ولا كأن نحن اعضاء هالفرقة . . و اذا اشتغلنا بروفة كل شوي حد فاتح الباب يطالعنا و يضحك  ويطلع يخبر ربعه .. شو يسوون ؟؟ وين يبون ؟؟ للحين ناس تشتغل اسكتشات ؟
هديل : و شو الجديد يا جماعة  .. نحن صار لنا 3 سنوات على هالحال  .. نسيتوا .. نسيت ( لعمر )  اول ما بدينا كيف كنا ؟ حتى ما كنا متوقعين حد يطلبنا بالاسم .. تذكرون شباب ( للجميع )  .. تذكرون اول مرة نتلاقى في الورشة اللي صارت في الصيف احلى صيف .. كنت طالعة من البيت و انا ياية في الدرب حاطة في بالي اول خطوة بخطيها في درب الشهرة .. رغم ان اخوي العود سلمان معترض على موضوع التمثيل بس اقنعته و قلت له بستوي مشهورة و بمثل في كل مكان و صوري بتنحط في الشوارع قبل رمضان و كل قناة بتحصل ويهي اول المسلسل و اخره .. كل شي بمثل مسلسلات و مسرحيات و افلام حتى اعلانات الشامبو ..
مسعود : هيه صدقتي .. ذيج الايام ما راح ترد .. ايام نظيفة .. كل واحد فينا في داخله بس احلامه و كيف يحققها لا شايل في قلبه حقد ولا حسد و ما عندنا القيل و القال .. كل واحد كان يحاول يكون الطالب المجتهد و يسمع كلام المدرب و المحاضر و كل واحد حاط جدامه شي واحد بس .. انه يكون احسن ممثل .. عاد  انا غير كنت حاط في بالي اصير ممثل و اطلع في التلفزيون و قلت يمكن اشتهر و باجر يوم اروح اداوم يقولون .. تفضل يا الفنان الكبير .. تفضل يا مشهور .. اذا رحت ادفع فاتورة ولا اخلص معاملة اشوف حسن الضيافة و ما اوقف في الطابور اتريا دوري  ..
فهد : بس من بعد الورشة وقفنا طابور طويل .. ما يخلص .. من ورشة لورشة و كل ما نقول للادارة نبا نمثل قالوا اصبروا  و صكونا بمسرحية يعطوني انا احدهم ولا انت رجل واحد و هديل يا امرأة 1 او احدهم في السوق .. و اذا قالوا لها تكلمي في المسرحية عطوها دور أم تقول جملتين و تصيح طول المسرحية .. انا في هالمجال من 10 سنوات لليوم محد عبرني ..
ياسر  : بس انته عالاقل مثلت مسلسل 
فهد : شو هالمسلسل يا حسرة .. حلقتين و الحلقة الثالثة حطوا واحد بديلي في السيارة و سوا الحادث .. ذبحوني من الحلقة الثالثة
مسعود : لازم هاي مسلسلاتنا اذا مافيه صياح ولا حادث و واحد يموت ما بيكون مسلسل .
عمر : يا جماعة الحين بدل هالكلام اللي ما راح يفيدنا ممكن نشتغل ولا نسوي بروفة هذا لو انتوا ناوين تشتغلون من الاساس      ولا تبون مثل كل مرة نقضيها ارتجال و نعلق على بعض جدام الناس و نخليهم يضحكون و خلاص  ؟
هديل : انزين بنشتغل يا عمر بس انت هدي اعصابك انا اشوفك متوتر من اول ما دخلنا .. ريح شوي و بنشتغل .. صح ياسر 
ياسر : هيه صح .. اسمعوني .. حميد رئيس قسم العلاقات العامة في الوزارة هو المسؤول عن اليوم المفتوح الخاص بالموظفين و انتو تعرفون انه هو اللي اختارنا بالاسم
مسعود : اخر عرض سويناه للبلدية كان وايد حلو
ياسر : هيه بسبب هاك العرض الريال اختارنا .. نحن ما سوينا بروفات وايد بس لا تنسون انكم احسن ناس ترتجلون على المسرح و الافيه عندكم حاضر بس ها اهم شي مثل قلنا و نقول دايما  .. نبتعد عن الاسفاف و مانبا تجريح
هديل : سمعتوا ما نبا تجريح .. اخر مرة فهد عق افيه ما كان حلو
فهد : يعني انتي اللي الحين كوميدية .. ترى نص الصالة ما تبا تشوف تمثيلج .. ياين يشوفون العرض لأنه فيه بنت .. مب من حلا تمثيلج يا انجلينا جولي
هديل : ياخي انته شو من البشر احترمي شوي .. ماكلة حلالك انا 
فهد : انا شو قلت الحين .. انتي اللي بديتي اتحملي
عمر : انا قلت لكم هالانسان المفروض ما يتم معانا صار له كم شهر و هو جي ينرفز  ياخي سير بيتكم ليش يالس
فهد : انت حط لسانك في بطنك و اسكت .. لا تتكلم ولا تتفلسف علينا
ينهض عمر من مكانه متجها الى فهد و يكلمه بصوت عال و تحدث مشادة كلامية و قبل ان يمد عمر يده يدخل حميد مدير العلاقات العامة 
عمر : ما بسكت و برمس شو بتسوي  .. تراك الا رمسة ما اشوفك تسوي شي
فهد : مد ايدك و شوف شو بسوي بك .. انت ناسي انا منو و مال وين ولا  ؟
عمر : هاي سوالفك انته .. واحد مال سكيك و ضرايب يبا يستوي فنان  .. انت لو فيك خير جان ما ودرتك خطيبتك
فهد : احترم نفسك  لا اكسر عظامك
حميد : شو هالحماس هذا  .. شكلها المسرحية بتكون حلوة هاه ..؟
ياسر : بو خالد .. شخبارك شو امورك .. شو هالمفاجأة الحلوة ( مرتبكا" ) يا جماعة هذا بو خالد .. حميد رئيس قسم العلاقات العامة في الوزارة و هو اللي اختاركم
حميد : الصراحة يا ياسر ربعك فنانين .. شوف توني و انا داخل اسمع اصواتهم قلت هيل قاعدين يتضاربون صدق .. لو اني ما كنت اعرف انهم ممثلين جان صدقت ههههههه
مسعود : هيه نعجبك .. شوف انت بس شو بنسوي على المسرح
حميد : اهم شي انكم تضحكون الموظفين .. عاد اليوم يوم مميز .. هو اليوم المفتوح و عندنا وايد فعاليات .. عندنا ترى سحب على الجوائز بعد  و فقرات ثانية غيركم .. بس عطيناكم المساحة الحلوة ( يخرج ورقة من جيبه و يبحث فيها ) هيه انتو الفقرة الرابعة بس لحظة .. يا صالح .. صالح
يدخل صالح و هو شاب انيق يبدو عليه الغرور ينظر اليهم بطريقة مشمئزة و هو سوف يكون عريف الحفل
حميد : هذا صالح اظني تعرفونه ولا ؟
ياسر : هيه اكيد منو ما يعرف المذيع صالح .. مشهور انا دربته ايام يوم كان يمثل معانا في الورشة
صالح : تفضل امرني بوخالد
حميد : شوف الشباب راح يقدمون لنا مسرحية كوميدية بعد فقرة الموظفين القدامى و تكريمهم
صالح : بوخالد اللي بيقدمونه اسكتش مب مسرحية .. لا تضخم الامور ( يضحك )
حميد : مسرحية ولا اسكتواش المهم شي كوميدي .. هيل فنانين بيضحكون الناس و بتشوف
صالح : ادري بهم من سنين و هم يضحكون الناس عليهم .. ممثلين ترى ولا
مسعود : هيه ممثلين و انت كنت واحد منا يا صالح تذكر ( يبتسم بخبث )
صالح : انا دخلت ورشة القاء عسب اتعلم بس ما استويت ممثل  ..
نرى تعابير وجه ياسر و هديل و مسعود تتغير بينما ينفخ فهد غضبا" و كأنه يود ان يقتلع رأس صالح من جسده و عمر واقفا" بين الصناديق ينظر بقهر لتصرفات صالح
حميد : انزين انت عاد تصرف و شوف كيف بتقدمهم انا الحين ساير اتابع الشغل .. اقول لك ياسر انتو مستعدين صح
صمت
حميد : اخوي ياسر  .. !!
ياسر : هيه اكيد يا بوخالد مستعدين و بنكون عند حسن الظن
يخرج حميد بينما يقف صالح في الوسط ينظر اليهم و كأنما ينظر الى شيء قبيح 
فهد : انت على شو شايف عمرك ؟ تراك كنت افشل واحد في الورشة نسيت ولا  ؟
مسعود : تحيدون كيف كان يقرا حوارات مسرحية
صالح : و شو يعني ؟ تراني الحين مذيع و الكل يعرفني .. خليت الحوارات و التمثيل لكم مب لازم اسوي مثلكم ..
ياسر : انزين صالح ممكن تخلينا شوي نبا نشتغل ورانا عرض  ..
صالح : الا هو اسكتش و ارتجال بعد .. يعني لا نص ولا بروفات ولا شي 
ياسر : ما عليه صالح خلنا شوي نبا نشتغل
صالح : تبون الصدق محد ضيعكم غير ياسر و افكار ياسر  .. ممثل انتهى تاريخه ماسك لي شوي شباب و يالس يعرض معاهم اسكتشات في المولات و يوم في دار المسنين و يوم حق الخدمات الانسانية و شو يا حسرة .. لا شهرة ولا عمات عين ... يلا
يخرج صالح و يحاول ان ينقض عليه فهد ولكن مسعود يمسك به بينما نرى ياسر و قد تأثر بكلام صالح
هديل : ياسر .. ياسر .. يابوي ما عليك منه .. انت الخير و البركة  .. تحيد منو كان يشجعنا و يعلمنا  .. و منو دربنا على الارتجال  ؟
ياسر : ذيج ايام ولت .. ايام اللي انا كنت فيها مطلوب بالاسم مرات كنت اشتغل في المسلسل بدون ما اطلب أجر و لا اعرف شو هي مساحة دوري .. بس احب اشارك ربعي الفنانين و اطلع مع فلان و علان .. همي اني اطلع و اراويهم موهبتي  .. حتى في المسرح كل دور خذيته كنت احصل اشادة من الجمهور ولا لجنة التحكيم .. 5 جوائز افضل ممثل على مدى 20 سنة .. 20 سنة دخلت المسرح و انا ياهل  .. اذكر كل عيد احضر مسرحية لأن المسرح عند بيتنا و كنت اشوفهم هالمبدعين كيف يخلوني اصدقهم ..هذاك مثل دور العمي صدقته و اللي مثل دور الخبلة صدقته .. و اللي كان ظالم صدقته و الطيب صدقته .. المسرح لعبة كبيرة ولا أرض الالعاب .. لا تقولون لي الملاهي  .. قولوا لي مسرح .. اول دور خذيته كان عن الشاعر احمد شوقي  .. للحين اذكر القصيدة و انا اقولها و في قلبي طفل فرحان بالعيد ..
مضنى و ليس به حراك .. لكن يخف اذا رآك
و يميل من طرب اذا  .. ما ملت يا غصن الاراك
20 سنة و انا احاول احقق حلم طفولة كانت دايما تغازل خيالي  .. اكون ممثل .. تدرون شو كان طموحي ابوي الله يرحمه .. قال لي مرة .. ياسر خاطري اشوفك طبيب اسنان و يوم اكبر تصلح لي ضروسي .. ضروسي بدت تتكسر و تطيح يا ولدي .. انت اللي بتركب لي طقم الاسنان صح .. صح يا ياسر ؟ مات قبل لا اخلص الثانوية ولا قدرت انسق مابين الدراسة والمسرح .. بس كبرت و مثلت دور طبيب الاسنان و البيطري و المدرس و الجندي و الضابط و الوزير و كل شي  .. مثلت .. بس عسب اراضيه .. و كنت أتلذذ بضرب العصا على ظهري يوم يقطعني الوالد و احب ايدين امي الباردة يوم تغسل الجروح وهي تهمس لي في الحوي .. ترى انا اليوم شفت مسرحيتك بس ما خبرت حد .. كانت تيلس في الصف الثالث و تفتخر فيني ودها توقف في نص الصالة و تقول هذا الممثل ولدي .. هذا اللي تشوفنه فوق يصل عرق ولدي .. هذا المبدع ولدي .. كانت تطير من الفرح يوم تسمع التصفيق  ... لي ما صفقني الحظ على ويهي و طحت ..
هديل :  انته ما طحت .. انت وقفت و خليت مجموعة كبيرة من الشباب يوقفون معاك لا تنسى منو اشتغل معاك قبلنا
ياسر : بس وين وصلوا ؟
هديل : وين ولا مب وين المهم انت الحين تسوي اللي تحبه ولا لا  .. و نحن معاك قم يلا خلنا نسوي بروفة قبل العرض .. قم دخيلك ..
فهد : انتو لو مخليني اضربه جان الحين تلقونه يصيح شرات اليهال
مسعود : و انت يا مستر عضلات ماعندك غير الضرب .. يلا شباب خلونا نبدأ
يستعدون للبروفة فجأة يرن هاتف عمر فيستأذنهم و يتجه ليكلم والدته
عمر : امي برمسج عقب عندي بروفة .. يا امي خليني اخلص تراني بعرض اليوم وبتصرف .. لا حول .. منو قال لكم هالسعر  ؟ افففففف ... خلاص خلاص ... مع السلامة
يجلس عمر فوق احدى الصناديق و يبدو عليه الضيق و من ثم ينظر اليهم يقترب منه مسعود
مسعود : خير عمر شو مستوي ؟
عمر : اي خير  ؟؟؟ اخوي بيعرس
مسعود : هذا بكبره خير .. عرس هذا مب عزا 
هديل : بالبركة .. يلا شد حيلك عقبالك ان شاء الله
عمر : اي عقبالي .. هذو  اخوي متلته و مب عارف يتصرف مصاريف العرس كل يوم تزيد و هم معتمدين علي انا
مسعود : ليش ؟
عمر : انت ناسي اني اخوهم العود .. المفروض اساهم لو بشوي و انا من وين ياحسرة لا دوام ولا شهادة ولا عماة عين .. انا لو مب هالاسكتشات اللي اشتغلها معاكم جان تلقوني الحين عطالي بطالي و جيوبي فاضية نظيفة 5 نحن في البيت و محد يداوم غير اخوي محمد اللي بيعرس الحين .. القاعة 26 الف و لازم احط شوي
فهد : جي انت تفكر بعد هالعرض بتحصل مليون ؟ الا هي 4000 ولا 3000 هاي اجورنا
مسعود : بعد الـ 3000 تسوي شغل  و تساعد
فهد : ياعمي روح .. شوف غيرنا كم يحصل  .. لا و القهر يطلبون اجور و عقود على شروطهم و نحن لو قلنا زيدونا 500 بدلونا نفس اليوم ..
عمر : هذا خلوه يسكت قبل لا ادفنه هني مب ناقص هم و غم فوق الهموم  اللي فيني  بروحي يالس اكرف و مب مخلي مسرحية ولا مسلسل الا و دخلته .. يا تلقوني في الانتاج ولا ورا هالكواليس اضبط الديكور و اكبر انجازاتي وقفت في مسرحية قلت فيها نعم مولاي انهم هنا و مسلسل مثلت فيه بظهري بس اونه كومبارس في مطعم .. و انا طموحي اكبر عن جي  بس اقول هذا نصيبي ما بقول لا .. اخواني يتريوني متى اطلع في التلفزيون او يحطون صورتي في الجريدة ... هي صورة وحدة بس و من بعيد واقف وياكم ..
هديل : تقصد الصورة الجماعية
عمر : هيه هي ... لليوم امي محتفظة بالصورة هاي و كل ما حد زارها من الاهل ولا ربيعاتها تراويهم هالصورة و تقول ولدي بيستوي شي كبير  .. و هالايام يتريون الكبير يسوي شي على الاقل حق اخوه
هديل : انزين انت قوم خلنا نسوي بروفة عسب نخلص و نحصل المقسوم و ساعد اخوك حزتها قوم يلا دلع .. يلا خلنا اليوم نبدع
فهد : هيه دلعيه .. اصلا هو يبا منج تدلعينه ولا ما بيسوي هالحركات ..
عمر : احترم نفسك ياخي 
فهد : صدق بعد شو  .. انت بس جي يا تسوي روحك مريض وقت العرض ولا انك مهموم عسب تطبطب عليك هديل و تمسح على راسك .. حبيبي فاهمين هالحركات  .. كنا نسويها قبل
هديل : انت ليش ما تسكت
فهد : سيري لا  ... اونه بتسوي عمرها الحين جولييت
مسعود : فهد انت لو مب عاجبنك الوضع ليش تام معانا 
في تلك الاثناء ينتبه ياسر لهديل التي تذرف دموعها من كلام فهد فيتجه اليها ليخفف عليها بينما ينظر فهد للوضع و يتجه بعيدا" و عمر ينظر اليه بغضب
ياسر : ماعليه .. انتي ما تعرفين فهد و لسانه الطويل ؟ المفروض تعودتي عليه
هديل : اتعود على شو ؟؟ ياسر ترى الكلام اللي عقه علي مب جديد .. شوفيها لو اني اخاف عليكم ولا اداريكم .. ترى في النهاية بينا 3 سنوات اشتغلنا فيها مع بعض .. اختكم انا لازم احس فيكم و اسمعكم و اساعدكم .. ترى يوم طحت انا محد ساعدني .. يوم اتطلق من ريلي محد وقف معاي و قال هاي مسكينة .. مالي الا امي و اختي الصغيرة و ولدي حمود اللي ما اشوفه الا من  جمعة لي جمعة .. و كل مرة اشوف ابوه يعايرني .. ها الممثلة .. ها يا كذا و كذا و كلام يسم البدن .. يا فيج كذا و كذا و كلام ما ينقال جدام امي و اختي .. ماكملنا سنتين الا و هو عاقني في بيت اهلي .. و مافي كلمة وصخة ما سمعني اياها بس لأني امثل و نسى هو كيف كان يركض وراي بعد ما شافني في مسرحية العيد ... ما عندي اخوان شفتكم اخواني و لازم اخاف عليكم  .. يا استاذ فهد ( و تبكي   )

في تلك الاثناء نسمع صوت الموسيقى و عريف الحفل يعلن عن بداية الفعالية و يدخل حميد
حميد : اوه هاي تصيح .. اخبركم الفعالية بدت مانبا مسرحية فيها صياح و ضيقة .. يكفي الناس في رمضان صاحت لي ما لاعت جبودها  .. نبا ضحك .. فرفشة ..
مسعود : لا هي بس نهاية المسرحية الام بتصيح و لا تنسى لازم نقول  المهم و اللي فيه الفايدة والعظة في النهاية
حميد :  المهم ياسر تعال اباك شوي
و يتجه حميد مع ياسر الى مكان اخر بعيدا" عن الفرقة
ياسر : امرني
حميد : اسمع نحن بنقص من مكافآتكم ..
ياسر : افا ليش؟ 
حميد : لا بس نحن زدنا عدد الجوائز و فقرة زيادة فيها فيديو عن الموظف المثالي و كلفنا شوي و لاتنسى الجوائز كلها ايفون و ايباد وبلاك بيري و لاب توبات .. الموظفين اولى يا ياسر لا تنسى هاليوم المفتوح لهم 
ياسر : انزين و كم لنا نحن الحين
حميد : شوف كانو 20 ألف الحين نزلنا الميزانية الى 12
ياسر : بس هالمبلغ ما بيكفي .. لا تنسى هالشباب فنانين
حميد : يا حبيبي اي فنانين .. هيل محد يعرفهم الا انت و انا اعرفك فنان و شفتك في فعالية البلدية كنت تضحك و تسوي جو حلو ... لا تدلعهم باجر بيبطرون .. ( يضحك ) المهم لا تزعل و لاتنسى في فقرات اهم بعد للموظفين صح  ولا  ؟
ياسر : صح ... صح ... اللي تامر فيه ( بضيق )
حميد : شدوا الهمة يلا انا ساير عن المدير و انتي لا تصيحين صدق ( يضحك )
و يخرج حميد بينما ينظر ياسر الى فرقته و ترتسم على ملامحه الضيق و القهر 

عمر :هديل بس لا تزعلين ..  شفت لسانك الزفر شو سوا .. انت صدق حيوان
فهد : يا عمي روح .. انت اللي يعني انسان ؟
مسعود : عيب يا فهد شو هالكلام .. 
فهد : روح انت الثاني  ..
ياسر : شباب ممكن تركزون نبا نشتغل .. ترى الفعالية بدت و نحن الفقرة الرابعة و ما سوينا شي تبونا نطلع بصورة تافهة ؟
مسعود : انا عندي اقتراح لو تشوفونه اوكي بنسويه
ياسر : قول يا مسعود
مسعود : انا اشوف لو نحن نقدم لهم اسكتش اللي قدمناه في البلدية بس نغير النهاية و نخلي الموظف المثالي هو اللي يتكرم بعد ما أصلح بين الموظف و المدير بتكون احلى
هديل : بس هاللي اسمه حميد شاف عرض البلدية اخاف يقول شي ما نبا ننحرج
مسعود : عيل مافي غير اسكتش الاسكان ولا .. اسكتش وزارة الاشغال
ياسر : لا خلنا نسوي اسكتش دار المسنين خفيف و بسيط و حلو
فهد : لا ياخي مب على كيفكم .. انا هناك مالي شي الا كلمة وحدة و انا الصراحة اليوم مابا امثل اي مشهد مع عمر ..
هديل : لو انت ما تبا ترى حتى انا مابا امثل معاك
فهد : انتي مثلي بروحج .. روحي سوي لهم منودراما و مللي الناس 
مسعود : يا فهد ماعندنا وقت  ولا تتشرط .. تراك بتاخذ نصيبك
فهد : مابا  .. تعطوني شوي بيزات  عسب هالكلمتين ولا مع منو .. مع توم كروز
عمر : انت ليش ما تكرمنا بسكوتك .. ياخي انا خاطري اعرف ليش تطلع فشلك هذا علينا نحن . . انت لو فيك خير رجع خطيبتك
ينهض فهد من مكانه و يتجه نحو عمر ينقض عليه و يحاول ان يضربه و يمسكه ياسر و مسعود يمسك عمر بينما تحاول ان تهديهم هديل
عمر : روح يلا .. لو انك ريال لا تتشطر على هديل ولا علي انا  .. روح لها و لأبوها و استوي ريال هناك
فهد : انت شو يخصك .. انا قلت لك تعال دافع عني  ؟ ولا قلت حق حد فيكم تعالوا و اخطبوا لي ؟؟
يصمت الجميع فجأة و كل منهم يتجه الى مكان بينما ينظر اليهم فهد بقهر و يكمل 
فهد  : ترى ما حسيتوا باللي انا حسيت به .. ما سمعتوا الكلام اللي انا سمعته و لو سمعتوا ما بيكون حالكم مثل حالي انا  .. واقف كل يوم اتريا باص المدرسة من صغري .. من كنا في الابتدائية .. من كانت تمشي في الفريج و انا احط اصابعي في عيون عيال الجيران .. كنت اغار عليها من كل ريال .. حتى من اخوانها  .. و هي نفس الشي  .. حبينا و سهرنا و ياما حلمنا و تكلمنا عن باجر .. كنت احس ان كل اغنية تنزل عن الحب غنوها عني ولا عنها  .. حتى وقت الزعل و العتاب .. شو بيكون احساسك يوم حد ياخذ قطعة من لحمك و يتم يغرس في جسمك سجينة و انت تصرخ و تقول بس .. دخيلكم بس  .. منو قدر يوقف في ويه ابوها .. منو اللي قدر يقنعها و يخليها اتم معاي .. ماصبرت قلت لها خلاص بداوم قالت لي ماباك تكمل في المسرح هي تقول اني مهرج و ابوها يقول اني عبارة عن مصخرة ولا نكتة .. منو يحترم فني .. محد عبرني يوم صرخت و انا اشوفها تنزف لغيري .. ياي انت تعايرني .. سير لو فيك خير كمل بيزات عرس اخوك وعقب عايرني انا  ..
هديل : انا احس ان اليوم هذا نحس .. مب يومنا الصراحة .. شوف شو قاعد يستوي فينا
مسعود : على اساس ان نحن شباب و المفروض نكون متحمسين للشغل و نعوض الطموح اللي انكسر فينا .. نذبح الاحباط اللي انولد في كل واحد منا و عاش داخلنا .. تروح للمسرح يقولون لك اصبر و صبرنا و رضينا بأدوار اقل من الادوار اللي حلمنا فيها .. كل شي سويناه في المسرح وكل واحد فينا قضى نص عمره في هالمجال .. ياسر انت كملت 20 سنة و شوف حالك فمابالك نحن اللي اكبرنا في المجال عمر و مكمل 8 سنوات .. كلنا ضحينا بأمور مهمة في حياتنا من اجل الفن .. كلنا رفعنا شعار الفن من اجل الفن .. و كل يوم نسمع حد يقول لنا انتو شباب جداد اصبروا شوي و بتحصلون فرصة .. و شوف كيف الحين يالسين ناكل بعضنا عسب نعرض و نفرغ هالطاقة اللي فينا  .. قطعنا الورش كلها ما خلينا ورشة ما دخلناها و ما قصروا معانا في الورش يعطونا كل اللي محتاجينه في المسرح بس عمرنا ما طبقنا اللي درسناه الا في هالاسكتشات .. سامحني يا اخوي ياسر بس صدق تعبت و احاول اطنش و اسكت لأني افرح و انسى همومي يوم امثل.. بس اليوم صدق كرهت كل شي .. شوفنا كيف قاعدين نضرب بعض بدل ما نتعاون ..
هديل : تعلمنا دايما اللي عنده عداوة مع حد ولا زعلان من حد يكون هالشي برع المسرح و من نوقف على الخشبة نحترمها و نعيش احلى لحظات ما يعيشونها باقي الناس  .. دايما يقولون لنا نحن مميزين و غير عن الباقين لأن نحن ممثلين .. اهم شخصيات المجتمع
مسعود  : بس مب جي يا هديل  .. شوفي قاعدين ورا كواليس بين الاغراض و الصناديق عسب نقدم لهم 20 دقيقة هم يضحكون ونحن ماكلين رمل و علينا غبار و هم اللي كاشخين و مرتاحين
هديل : مسعود انت المفروض اعقلهم جي تقول ؟
ياسر : خليه يفضفض و يقول اللي في خاطره ولا يكتم .. ولا انا بخش عنكم شي و بقول لكم خبر يمكن مب وقته بس لازم تعرفون الحين الموضوع اللي وصلني قبل شوي 
هديل : خير شو مستوي ؟
ياسر : نزلوا من ميزانية فقرتنا و قصوا البيزات .. انا كنت متفق معاهم كالعادة 20000 بس هم خلوها 12000
فهد : يلا تفضل .. شو تبون تسون فينا انتو اكثر عن جي  .. يعني كل واحد كم له ؟
مسعود : لحظة .. يعني كل واحد فينا له 2400
عمر  : و هاي شو بتسوي لنا  يا ياسر ؟ عالاقل 5000 كانت بتسوي لنا شي الحين ارد البيت شو اقول لهم  ؟ هاي حتى ما تكفي حق المطبخ و عشا الرياييل .
هديل : الحين 2400 و مصاريف البيت و اختي و ولدي حمود
فهد : هذا سعر الابداع .. هاي هي قيمتنا  ؟
يدخل صالح و ينظر اليهم و يقول 
صالح : انتو هيه  .. ليش مسوين حشرة  مب قادر اركز .. سيروا ايلسوا هاك الصوب صوتكم واصل لعندي تبون تسونه السيرك مالكم سوه بعيد مب هني  .. يلا عن الحشرة ترى عادي الغي فقرتكم و اطوفها الا هي ورقة اقراها و اغير الفقرات و حميد ما بيقول لي شي ترى هو مب خسران شي و بيزاته بترجع له الا هي كمن ألف
يضحك عليهم و يخرج من المكان بينما ينظر كل منهم الى الاخر
مسعود : انا في يوم وقفت و قلت حوارات كتبها ويليم شيكسبير و حصلت شهادات و دخلت ورش علموني احسن و افضل الفنانين و الاساتذة ...
هديل : تحملت السب و الاهانة من اهل طليقي  و منه هو كل يوم كنت اشرب سقم .. بس يوم ادخل المسرح اضحك و اسولف و امثل كل دور بضمير و الكل اشاد فيني و قال انتي بتكونين نجمة المستقبل 
عمر : وقفت في يوم جدام اكبر النجوم و الشخصيات المهمة و قلت احلى الحوارات اللي انكتبت قلت في جنة ياقوت :
الله الله يا بوسلوم.. خذت القمر  من السماء وحطيته بين إيديك

تتمنظر فيه.. عاد يعل عينى الصب جان ما إنترست من غواج

وحلاتك يا جناه..أه لو تدرين بلوعة قلبى وشفاقته عليك ..

غادى شرى الطير إللى فى السماء يهوم يدورله وليف..

فهد : انا ما خليت حوار ما حفظته ولا بروفة ما دخلتها ضحيت عشان هالمجال و اخر شي واحد مثل صلوح الممثل الفاشل اللي ما عرف يمثل أي شي يصير مذيع متكبر و يتكلم علينا  ؟ !!
ياسر : يا شباب .. ركزوا عدل انتوا شباب و للحين كل واحد فيكم في بداية طريقه .. اكبركم عمره 25 سنة و انتو في هالمجال من الصغر .. يعني مب اول مرة حد يسمعكم كلام يسم البدن ولا حد يعاملكم بهالطريقة .. مثل ما كانت في ايام حلوة ترى لازم نشوف ايام مرة و نذوقها و  نحس عقبها بالفرحة .. مب الاحباط .. بس دام ان اليوم انكسر فيكم الحماس و اللي صار اليوم احبطكم .. انا ما اقدر اقول لكم شي بس صدق الميزانية نزلت و انا مب قادر اسوي شي  ..
فهد : اسمحلي ياسر  ..  انا مب مستعد استوي مصخرة حق ناس ما تقدرنا  .. ولا تزعلون مني انا انسان اللي بقلبي على لساني ولا اخاف من اللي اقوله .. انا ساير 
ينظر اليهم فهد و من ثم يخرج 
هديل : شو هالحالة ..
عمر : اخوي ياسر .. انا ما اقدر اكمل لأن صدق محتاج مبلغ اكبر من هالمبلغ و سامحني  .. بس قبل لا اطلع بقول لك شي امي دايما تقوله لي  و انا اللي ما اسمع كلامها  .. كانت تقول لي دايما الوظيفة بالأول و من بعدها الهواية  و نحن مشكلتنا الكبيرة خلينا الهواية وظيفة و الوظيفة ضيعناها  .. سلام

يخرج عمر بينما يقف ياسر في الوسط ينظر الى مسعود و من ثم الى هديل و يبدو عليهم الضيق و الحزن و الموسيقى تتصاعد خلفهم و صوت عريف الحفل و هو يقدم الفقرات
اظلام

يتغير المكان و يتحول الى مقدمة المسرح و الخشبة و عريف الحفل يقدم الفقرات و يعلن عن الفقرة القادمة 
صالح : و الان مع الفقرة الكوميدية و فرقة الشباب المسرحي المتجول
تفتح الستارة و لكن لا يوجد احد على المسرح و بعدها ينهض حميد من مكانه و يتجه الى عريف الحفل  و من ثم يدخل الكواليس و يرجع و يهمس في اذن صالح و يرجع الى مكانه  فيكمل صالح و هو يضحك
صالح : شكلهم راقدين في بيوتهم مب مشكلة خلونا في الاهم الحين و ننتقل الى السحب و هالسحب بيكون على الايباد و البلاك بيري  .. يلا نسحب الارقام ...
موسيقى و اغاني خاصة بالسحب

اظلام

النهـــــــــthe endــــــــــاية