المسرحية
الكوميدية
بيت نصف المجتمع
تأليف : طلال محمود
الشخصيات :
-
اسماء ( الأخت الكبرى ) موظفة في مدرسة حكومية تحمل هم البيت و تحاول ان تعوض اخواتها فقدان
الوالدين
-
نوال ( الاخت الوسطى ) ربة منزل سابقة مطلقة تعاني من ماضيها
و تتألم بسبب طلاقها و نظرة المجتمع لها
-
عبير ( الاخت الصغرى ) طالبة جامعية موديل 2010 تواكب
العصر و الموضة
-
ريحانة ( الخالة ) مطربة افراح سابقة تكسن معهم بعد ان تم طردها من بيتها بسبب
اولادها وهي شبه الراوي في قصتنا
-
الصحفية
-
عزيزة ( صاحبة الصالون )
-
حنان ( صديقة عبير )
نبذة عن القصة :
ـ
~ في يوم واحد
سوف نرى حكاية 4 نساء يتجمعن في بيت واحد 3 اخوات و خالتهم العجوز و سوف نرى كيف
يمر هذا اليوم و تتشابك به قضايا و احداث و خطوط لكل شخصية .. في يوم واحد سنرى ما
يحدث كل يوم في كل بيت و بقلب كل امرأة ~
طلال محمود
الجو العامـ :
ـ
~المسرح عبارة عن
باحة ( حوش ) لبيت ذو تصميم عربي متوسط
الحال و الغرف تطل ابوابها و نوافذها على المكان
و نرى على طرف المسرح الأيمن مجموعة كراسي و طاولة لشرب الشاي و على الطرف
الآخر من المسرح جلسة عربية و في الخلف نرى لأدوات المطبخ مرتبة بالقرب من باب
المخصص للمطبخ و تصميم البيت و الوان الجدران ترتسم الملامح بأن المنزل يغلب عليه
الطابع الأنوثي و باب البيت في الوسط ~
المشهد الأول :
ـ
تخرج الخالة
ريحانة من غرفتها و تتثاوب و الجو في أول الصباح تتجه الى الحمام لكي تغسل وجهها و
لكنها تقف فجأة عند الجلسة العربية و تنظر الى المطارح المتناثرة تفرك عيناها و
فجأة تصرخ بصوت عال فيتحول البيت كله الى ثكنة عسكرية الكل يخرج من غرفته و صوت
صراخ الخالة يتحول الى بوق( مؤثر صوتي ) عسكري
اسماء ( بتهكم )
: يا ربي من صباح الله خير صراخ .. شو نهاية اليوم ؟؟
نوال ( بتعجب ) :
خالتي ريحانة عسى ماشر .. ؟!!
عبير : oh my god خالوه
ريحانة : انتو ما
تستحون .. ما تخيلون .. مافيكم دم .. مافيكم احترام
نوال : الحين ليش
كل هذا شو اللي صاير .. منو اللي غلط عليج ؟
اسماء : يا خالتي
.. هدي شوي .. ترى نحن مب فاهمين شي
ريحانة : انا
اموت و اعرف شي واحد بس .. منو اللي حرك هالمطارح و بعثرها .. احس انه بعثر كياني
..
عبير : بعثر منو
؟؟
نوال :
كيانها .. خالتي اللحين المطارح من امس
طايحة في الحوش انتي خليتيها سالفة كبيرة و قمنا من النوم
ريحانة : آه
يالقهر .. لازم .. لو ما تبوني قولوا لي اطلعي من البيت و بطلع
اسماء : محد قال
هالكلام و انا بنفسي بعدل لج المطارح و حقج على راسي من فوق
تتوجه اسماء لكي
تعدل المطارح بينما تمنعها ريحانة و تعدل بدل عنها تبتسم نوال لـ عبير ومن ثم تقترب عبير و تهمس في اذن اسماء فتتغير
ملامح اسماء و تشير لها بالنفي بينما تصر عبير على الكلام
عبير : خالو my love يا احلى قلب ..
ريحانة : خير ..
شو تبين ؟؟
عبير : انا بقول
لج شي بس لا تعصبين ولا تذبحيني ok
ريحانة : انا
اللي ذابحني .. ان اختي ما كانت ماريا .. كانت سعيدة و انتي على منو طالعة تتكلمين
كلام مكسر ؟؟
عبير : خالو هذا
استايل. . المهم شوفي اللي بعثر المطارح امس .. امممم .. انا
ريحانة : نعم ؟؟؟
ليش ؟؟
عبير : كنت انا و
صديقتي حنان نذاكر برع .. قالت لي القمر شكله روعة و بعد المذاكرة قمنا نلعب
بالمطارح .. it's so funny
~ لحظة صمت و
ترقب اسماء تنشغل في المطبخ و نوال تتجه
الى الحمام بينما تنظر ريحانة الى و تتجه نحوها مع موسيقى ترقب و رعب ومن ثم تركض عبير و ريحانة خلفها ~
تخرج نوال من
الحمام و من ثم تتجه و تجلس على طاولة الطعام و تخرج اسماء من المطبخ و تتجه نحوها
و ترى الحزن المرسوم على وجهها تقترب منها و تضع يدها على كتف نوال
اسماء : للحين
تفكرين بالموضوع ؟ انسي خلاص
نوال : انسى ؟؟ و
عمري اللي ضاع معاه ؟
اسماء : لا تنسين
انها كانت غلطة الكبار .. و االحين
نوال : الحين انا
اللي يالسة في بيت الاهل .. هم راحوا الله يرحمهم و هو يتمتع في بيته و انا هني
يالسة احترق و المصيبة ان الناس ما ترحم .. بنظرهم انا مطلقة .. يعني شي يفشل ..
ما يقولون شو هي الاسباب وليش .. بس خلاص مطلقة .. عيل انتي فيج و فيج و فيج ..
اسماء : يا نوال
.. مب من اول الصبح تفتحين جروح و مواجع .. يكفي صباح التجنيد اللي سوته خالتي
ريحانة .. قومي يلا سوي لنا ذاك الريوق اللي يفتح النفس ويكسر الريجيم و يزيد
الوزن .. ههههه
تبتسم نوال و من
ثم تنهض و تدخل عبير تلهث و خلفها ريحانة
عبير : خلاص
خالوو .. خلاص .. بناخذ الميدالية الذهبية في سباق التتابع بس ..
ريحانة : اخ منك
منقهر .. ما عاد فيني صبر ..
اسماء :
خالتي .. ريحي شوي .. و الله يخليج يا
عبير مرة ثانية ما تبعثرين كيان خالتج .. لا تنسين انها مطربة افراح قديرة
ريحانة : و طباخة
اعراس مشهورة .. انا الشيف ريحانة السمن .. اللي كانت تعبر القارات بصوتها ..
تدرون مطربات جيلي منو ؟؟
تخرج نوال رأسها
من المطبخ و تكمل الجملة بدل ريحانة
نوال : انا عاصرت
ام كلثوم و فيروز و اسمهان و.. خالتي نعرف القصة
اسماء : صح
عبير : we know that سمعناها فوق الـ مليون مرة ( تدخل غرفتها )
ريحانة : الا
مليون و واحد .. شكلكم مليتوا مني ..
تبوني اطلع من البيت صح .. ؟
اسماء : يا خالتي
الله يهديج منو ياب هالطاري الحين .. تعالي بنعدل المكان و مرة ثانية يا عبير
تذاكرين في غرفتج .. تعالي خالتي ..
ريحانة : و الله
خوفي تصيرون مثل عيالي ..
اسماء : افا ..
نحن بناتج ..
ريحانة : لا
تسوينها مسلسل خليجي .. مب ناقصة شو اليوم
ماشي ريوق ولا نصوم ؟؟
نوال ( من المطبخ
) : ياية .. الحين بس اصبري شوي ..
تخرج عبير و هي
تلبس ملابس الجامعة و تحمل بيدها البلاك بيري و اللاب توب
عبير : يلا girls
انا سايرة الجامعة بلحق
عالمحاضرة الأولى .. و برد من وقت اليوم
اسماء : تعالي
تريقي .. تروحين على يوع
عبير : لا باكل
في الجامعة .. من الكوفي شوب
ريحانة : شو حد
ياكل قهوة عالصبح .. ؟؟
عبير : خالو ..
كوفي شوب يعني .. اممم .. كافتريا .. يلا بااي
( تخرج )
ريحانة : الحين
تترك الريوق السنع .. طباخ نوال .. و تروح تاكل من الكفتريا اللي ما يندرى الاكل
من متى مطبوخ .. اقول اسماء .. انتي اليوم ما عندج دوام ولا اجازة و لا شو بالضبط
..
اسماء : اليوم
انا مأجزة بس بحضر اجتماع اولياء الأمور وراجعة .. ما بطول ..
ريحانة : الله
يوفقج .. ادري فيج شايلة حمل البيت و حملي انا .. و ناسية روحج ..
اسماء : ما عليه
يا خالتي .. لازم اجابل البيت ...
ريحانة : يا ربي
ردينا نسوي مسلسل خليجي .. وين الريوق يا نوال ..
تدخل نوال و هي
تحمل الصينية و بها الطعام و تتوسط الحوش
ريحانة : هاتي
الريوق هني صوبنا ..
نوال : خالتي
تعالي ناكل عالطاولة ..
ريحانة : تعالي
هاي نعمة الله شو طاولة ما طاولة .. ناكل على الارض تواضعوا شوي
نوال : ما ادري
يا خالتي انتي كل يوم تطلعين لنا بسالفة .. بس عسل .. وين سارت عبير؟؟
ريحانة : تاكل
قهوة .. في الكافتريا
اسماء : راحت
الجامعة ..
تجلس نوال و
اسماء بجوار ريحانة يتناولون الفطور بينما تقول ريحانة
ريحانة : اليوم
بتزورنا صحفية ..
نوال : شو ؟؟
اسماء : خير ؟؟
ريحانة : مثل ما
سمعتوني .. بتزورنا صحفية .. اووه صح لازم اعدل الجملة .. بتزورني صحفية ..
اسماء : ليش ..
خير ..
ريحانة : انتو
نسيت واني انا مطربة قديرة من الزمن الجميل ذات الحنجرة الذهبية .. افضل من طبخت للأعراس في الخليج العربي ..
اسماء : يلا انا
الحين بتحرك بروح المدرسة بخلص اللقاء و برجع
نوال : لقاء ؟؟؟
شو الموضوع
اسماء : لا انا
اقصد لقاء و اجتماع مع اولياء الأمور . . لقاء خالتي غير .. لقاء الشهرة
تنهض اسماء و
تتوجه الى غرفته
ريحانة :
لازم .. لازم .. ما يعجبكم شي .. تغارون
من شهرتي
نوال : محد يغار
.. بالعكس نحن نفتخر ..
تخرج اسماء من
الغرفة و تودعهم و تذهب الى الخارج و تنهض نوال
بعد ان تنتهي الخالة ريحانة من تناول الفطور و تدخل الى المطبخ بينما تجلس
ريحانة في مكانها
نوال : خالتي انا
بكون في المطبخ .. بنظف و بطبخ لو بغيتي شي ناديني .. بس بدون صراخ
و تدخل
ريحانة : اليوم
بكمل 5 سنين في هالبيت .. 5 سنين و انا احس اني ناقصة .. حتى لو بنات اختي
المرحومة معاي .. بعد احس بنقص .. وين عيالي ؟ اكبرهم راح و تركني و اصغرهم تركني
ليش الله ما رزقني ببنت ؟ .. يمكن تتذكر امها .. خوفي حتى هي تتعلم منهم و تتركني
مثل ما تركني ابوهم و لحق المنكر .. 5 سنين و احس كل يوم اني ثقيلة و حمل على
هالبيت واهله حتى بعد وفاة اختي .. شو اقول للصحفية .. حياتي انا مسلسل خليجي و
اكثر من 30 حلقة و يمكن زيادة ..
يرن جرس الباب
تنظر ريحانة للباب و تتعجب تنظر للساعة و
من ثم للباب و تخرج نوال من المطبخ و تنظر للباب و لخالتها
نوال : خالتي
تبيني افتح الباب ولا تروحين انتي ؟
ريحانة : الصحفية
شو يابها الحين ؟؟
نوال : اي صحفية
؟؟
ريحانة :
المقابلة .. انا للحين ما جهزت .. اقو لانا بروح الغرفة بتعدل و انتي افتحي
الباب ( تدخل الى غرفتها مسرعة )
نوال : خالتي
عليج قصص .. و مواقف .. ( تفتح الباب و
تدخل صاحبة الصالون عزيزة )
عزيزة : من ساعة
واقفة ادق في هالباب حتى بابكم صرخ في ويهي وقال بس ..
نوال : خالتي يا
عزيزة .. ساعة تفكر تفتح ولا لا.. على اساس انها تستعد للمقابلة الصحفية
عزيزة : عشنا و
شفنا .. مقابلة .. على اساس انها اليسا صح ؟
نوال : اسكتي لا
تسمعج الحين و تقلب البيت فوق راسنا
عزيزة : و لو
سمعت .. انا ابي اعرف هي ليش ما ترجع بيتها .. بس ما ملت
نوال : و اللي
يرحم والديج اسكتي .. لا تعورين قلبها بهالموضوع .. صار لها اكثر من 4 اعياد ما
شافت حد من عيالها ولا سمعت صوتهم ..
عزيزة : اوووه
شوه العيال .. اكيد ريحانة امهم ؟؟
نوال : تعالي
انتي الحين و مسوية لج شاي اخضر يحبه قلبج
عزيزة : كيف يحبه
قلبي .. ترى الشاي يكون جاهز في علب .. اللي يسمعج كأن انتي اللي منقية الأوراق ..
نوال : انا اموت
و اعرف لسانج هذا ليش جي .. انتي متأكدة عندج زباين في الصالون
عزيزة : خلج من
الشاي .. تعالي انا ابيج في موضوع مهم
نوال : شوه
الموضوع ..
عزيزة :
تعالي اقعدي شوي ..
نوال : لا تطولين
وراي طباخ ..
عزيزة : ياية و
ياببة الرزق لكم .. انتي و اخواتج .. بترتاحون للأبد
نوال : اي راحة
هاي .. لا يكون طلع لنا ورث و نحن ما ندري ؟
عزيزة : الله
يرحم والديك من وين يجي الورث .. نسيتي ابوج ؟
نوال : يلا عاد
.. بسج طنازة شوه الموضوع ؟
عزيزة : اليوم
سمعت وحدة في الصالون تقول انها تدور بيت
عربي و بتشتريه بأي ثمن
نوال : انزين ؟؟؟
نحن شو دخلنا ..
عزيزة : انتي و اخواتج عندكم هالبيت .. ليش ما تفكرين
فيها صح .. البيت ييب له سعر هالايام و راح يمر قريب منه شارع عام بعد فترة يعني بيتكم بيكون على شارعين و الشارع الجديد
راح يكون تجاري يعني جدامك راح تكون في محلات .. فكري كم بيجيب لكم البيت ؟؟
نوال : تدرين لو
تسمعج اسماء بتحرقج .. و لا تسمعج خالتي ريحانة ..
تخرج ريحانة من
غرفتها متزينة بشكل غريب تضحك عليها عزيزة
ريحانة : وين
الصحفية ؟؟
نوال : خالتي
.. هاي عزيزة راعية الصالون اللي ورا الشارع ..
ريحانة : ادري ..
يعني عزيزة مب اليزابيث ..
عزيزة : شخبارج
فنانتنا .. ان شاء الله بخير ؟
ريحانة : انا كنت
بخير بس شفت شي ضايقني ..
عزيزة : اكيد
مكياجج .. صح .. ؟
نوال : خالتي
تقصد انها يعني تبا تسوي لج مكياج .. تبي راحتج ..
ريحانة : بطوفها
على مزاجي .. لأن لازم حالتي النفسية تكون مستقرة للقاء
عزيزة : يا عيني
على كلام نواعم ..
ريحانة : شو رايج
تسمعين كلام ثاني .. يمكن يعجبج
نوال : يا خالتي
.. يا عزيزة بسكم ..
عزيزة : االمهم ياختي نوال انا رايحة المحل و انتي فكري
في الموضوع عدل و شاوريهن
نوال : انزين خلج
قاعدة للغدا
ريحانة : الاكل
ما يكفي ..
عزيزة : لا ما
عليه باكل في المحل و عقبها بروح البيت عند عيالي ..
و تخرج بينما
تحزن ريحانة لجملة عزيزة و تأتي نوال و تمسك بيدها
نوال : خالتي ..
عزيزة ما تقصد .. بس هي تحبج و ..
ريحانة : روحي
جابلي المطبخ ..
نوال : ان شاء
الله شوي و يكون الغدا جاهز و بنتغدى و تستانسين بعد ..
ريحانة : و انتي
مستانسة ؟
نوال : ليش انا
شو فيني يا خالتي ؟
ريحانة : ولا
شي .. بس قولي الحمدلله انج ما حملتي منه
و يبتي عيال
نوال : خالتي
الاكل عالنار .. عن اذنج ..
تدخل نوال للمطبخ
و هي حزينة بينما تتمشى ريحانة في البيت
ريحانة : حتى حزنج يا نوال يصرخ و يقول انج مكسورة بسبب
هالريال .. غصبن عليج تاخذينه .. الله يرحمك يا خالد غصبت بنتك و خليتها تدفن
نفسها مع رجال اكبر منها بعشرين سنة و خليتها اليوم مطلقة بسبب واحد ما يخاف الله
.. دنيا ..
تدخل عبير و معها
صديقتها حنان و هما يضحكان
حنان : اوووه
خالوه ريحانة .. يا قلبي والله
ريحانة : حنان يا
اسم على مسمى
عبير : و انا محد
يعبرني يعني ولا محد يحبني ..؟
ريحانة : انتي
اسكتي .. تعالي يا قلبي تعالي
تقترب منها حنان
و قبل ان تحضنها تمسكها ريحانة من شعرها و تقول لها
ريحانة : مرة ثانية
يوم تذاكرين انتي و هالساحرة روحوا الغرفة .. مب تتعبثون في مملكتي
حنان : اخ اخ اخر
مرة ... شعري لا .. الا شعري
عبير : don't kill her
ريحانة : انتي
كلي الكمبيوتر اللي في ايدج و اسكتي .. سمعتي انتي يا حنان القهر
و تتركها .. تنظر
حنان الى عبير و من ثم تنظر الى ريحانة و تذهب للمرآة في غرفة عبير و نسمعها تصرخ
بصوت عال و تخرج مسرعة من الباب
عبير : زين الحين
زعلت نونة مني
ريحانة : منو
؟؟؟؟
عبير : نونة ...
ريحانة : نونة
... و انتي شو دلعج ؟؟
عبير : بوبو
ريحانة : اخ بس
اخ .. وين بنات قبل .. وين ايام قبل .. مب الحين .. جيل بعد جيل قاعد يتميع و
يخترب .. بي بي .. و فيس بوك .. و مسلسلات
تركية .. اخ .. وين قبل انا امي الله
يرحمها مرة شافتني اسمع عبدالحليم حافظ .. قامت و كسرت الراديو على راسي .. مرة
كنت اشوف فريد شوقي يضرب توفيق الدقن قمت و صفقت له قام ابوي و صفقني انا بطراق
لليوم اسمع طنته في اذني ..
عبير : واو ..
قصصج و يوميات wonderful
ريحانة : اقول ليش ما تروحين غرفتج احسن لج .. يلا
نوال ( تخرج
رأسها ) : زهب الغدا .. استعدوا ..
عبير : البيت هذا
ما فيه حد صاحي ..
ريحانة : شو
عبير : قلت بروح
اشوف مسلسل مناحي . .
ريحانة : بطوفها
لج لأنها عجبتني ..
تدخل عبير الى
غرفتها و ترمي بالملابس بينما تدخل اسماء
اسماء : كأني شفت
حنان وهي تركض للسيارة وشكلها كان مبهدل ؟؟
ريحانة : مسكينة
اتكهربت .. كانت تستشور شعرها .. تدرين
قضاء و قدر
اسماء : وين البنات .. ؟
ريحانة : اخواتج
يا سندريلا وحدة في المطبخ تجهز الغدا و الثانية توها رادة من الجامعة
اسماء : اه يا خالتي .. اليوم أولياء الأمور .. منهم
اشكال وانواع .. في منهم اللي يهتم في عياله و يتابعون كل شي يصير بالمدرسة حتى
في سخان ماي في غرفة المدرسات امس احترق
جان تقول وحدة من الامهات عن
هالموضوع .. و في اللي خير شر ما يعرفون
عيالهم اي صف و يروحون المدرسة ولا لا .. خليها على الله ..
ريحانة : انتي
لاهية بهالدوام و فينا نحن . . جابلي نفسج .. جابلي حياتج الخاصة .. جابلي
اسماء : اجابل
اختي عبير و نوال .. احسن من كل هذا يا خالتي .. انا لو تزوجت الحين و تركت عبير و
نوال و تركتج .. شو يطمني انكم تاكلون ولا تشربون ولا تحتاجون شي
ريحانة : نحن
كبار .. يا اسماء
اسماء : شو اللي
يضمني هاللي بياخذني مابيكون مثل ابوي ولا زوج نوال و لا زوجج والعيال بيكونون مثل
عيالج .. اسف خالتي ريحانة اني اعور قلبج .. بس هالواقع .. في بعض المجتمعات ما
يعتبرونا بشر .. بس آلات تتحرك و تقضي حاجات الرجل ..
ريحانة : يا ويلي راحت البنت .. لا تتعقدين انا شفت
مرة مسلسل البنت تتعقد و اخر شي يودونها الطب النفسي
اسماء : ترى
المسلسلات تعكس واقعنا
تأتي نوال
بالغداء و تذهب نحو طاولة الطعام و تقول
نوال : عاد خالتي
بتقومين تتغدين معانا عالطاولة وحدة بوحدة
ريحانة : في
الغدا انا ما اقدر اقاومج اكيد بكون عالطاولة
تخرج عبير
عبير : عيل
تقولين يوم كنا نتريق عادات و تقاليد .. و
ريحانة : تبين
تصيرين مثل حنان .. نونة مالتج ؟
عبير : خالتي
اقعدي وين ما تبين انتي الحب كله
اسماء : شو
السالفة .. ؟
نوال : السالفة
عندي انا اسمعوني .. و اسمعوا الخبر اللي يمكن يفيدنا ..
ريحانة : قولي ..
نوال : يا جماعة
.. اليوم زارتني عزيزة صاحبة الصالون و قالت ان في حرمة تبي تشتري بيت عربي و بسعر
ممتاز و العين على بيتنا ..
~ لحظة صمت و
تتغير ملامح الجميع
عبير : انزين
كملي
اسماء : شو تكمل
بعد ..
نوال : ليش يا
اختي انا شو قلت ..
ريحانة : نوال
خلاص صكي الموضوع وخلينا نتغدى
نوال : لا ليش
اصك الموضوع .. و انا اطبخ قعدت احسبها .. بيطلع البيت بالملايين لأنه صح بيكون
على شارع تجاري .. و
عبير : ياي حلو
.. ملايين ..
ريحانة : ياي ..
ما تبين تكملين الأكل ولا شو
اسماء : نوال ..
انسي الموضوع خلاص ..
نوال : ليش انسى
.. بنكسب ذهب و ملاين من ورا هالبيت .. ليش تبين تصكين باب الخير
اسماء : في وايد
بيوت في الفريج خليهم يختارون بيت غير بيتنا .. مب شرط نحن
عبير : بس يا
اسماء اظني ان الصفقة لصالحنا و نقدر نعيش في اي بيت ثاني و احسن من هالبيت ..
اسماء : احسن من
هالبيت ؟؟ وين ؟؟ و ليش نطلع اصلا .. هالبيت بيتنا كلنا
نوال : انزين دام
انه بيتنا كلنا .. عيل ليش ما يكون الشي لصالحنا كلنا ..
ريحانة : يا نوال
قلنا بس خلونا ناكل لقمة مثل الناس ..
نوال : انتي اول
شي خلينا نعيش نحن مثل الناس ..
اسماء : اتكلمي
عدل يا نوال .. نسيتي انها خالتج ؟
نوال : انا اتكلم
عدل و بالعقل .. و انا ما قلت شي غلط .. انا اشوف ان هالبيت لو ينباع بنعيش
مرتاحين اكثر من هالعيشة .. انا ابي اجابل نفسي و افتح لي محل و استرزق منه .. و
عبير لها احتياجاتها .. و خالتي بعد و انتي .. ولا بتمين عانس في هالبيت طول حياتج
.. و تعاملينا كأن نحن عيالج
اسماء : بس يا
نوال .. و صلتي حدج و زيادة ..
عبير : بس خلاص
.. مب لازم ينباع البيت .. انا ما بي شي ..
نوال : اسماء ..
انتي شو حالتنا .. 4 حريم قاعدين في بيت
قديم لا ولي ولا صاحب
اسماء : يعني
نقوم انبيع البيت عشان نتونس .. ترى انا اشتغل و خلاص و انتي معاش الشؤون و النفقة
توصل لج .. و عبير انا بوفر لها كل اللي تبيه ..
نوال : بس ..
خلاص .. يعني هذا هو حلج .. يعني انا مثلا لو ياني النصيب ما اروح لأن معاش الشؤون
لكم ؟؟ و اذا لا قدر الله تقاعدتي ولا فنشوج عبير تقعد في البيت مثلا"
تتوجه اسماء الى
غرفتها بينما يرن جرس الباب تتجه عبير لكي
تفتح الباب و من ثم تدخل الصحفية الى المنزل و تدخل اسماء الى غرفتها بينما ترحب
بها ريحانة
الصحفية : كيف ..
حالج يا ريحانة ..
ريحانة :
الحمدلله .. انتي شخبارج ؟
الصحفية : انا
احس اني ياية في وقت غلط .. اقدر اروح و ارجع بعدين ..
ريحانة : لا
بالعكس .. انتي ياية صح .. حياج في مجلسي الموقر .. تعاالي اتغديتي لأننا كنا شوي
وبنتغدى
الصحفية : اهاا..
دام انه وقت غدا ارجع لكم بعدين ..
ريحانة : تعالي
الله يهديج بس .. اقعدي هني .. تفضلي . .
شو تشربين .. شاي ماي قهوة كوفي شوب
عبير : يعني قلتي
شي ..
الصحفية : لا شاي
و لا كوفي شوب !!!؟
ريحانة : اعرفج على بنات اختي .. عبير الصغيرة الدلوعة
.. طالبة جامعية سنة ثانية لغات
عبير : مرحبا..
كيف الحال ..
الصحفية : يا
حياج الله يا عبير ..
عبير : تقدرين
تناديني بوبو .. I like it
ريحانة : و هذي
نوال الوسطى ربة بيت سابقا" .. احسن طباخة من بعدي طبعا "
الصحفية : اهلا و
سهلا" .. انزين يا مدام ريحانة .. او لو تحبين اناديج بأم فلان و لا شو
بالضبط
ريحانة : مثل ما
تبين .. انتو الصحافة .. اهم شي ما تزعلون لأن بعض هالصحفيين لو عجبه شخص رفعه
السما و ان ما عجبه كتب فيه و عليه و طلع عليه فضايح و يخليه بيزة ما يسوى
الصحفية : مو
الكل .. في منهم اصلا مالهم شغل بالصحافة . . مهنة من لا مهنة له .. شغل واسطات و
اهل فلان و علان .. بس ما يتميز غير الصحفي الجيد ... مثلي
ريحانة : هيه
والله مثلج ( لنفسها ) مداح نفسه ,,
الصحفية : في شي
؟؟
ريحانة : لا ولا
شي حياتي .. قولي آمريني .. اسأليني ..
الصحفية : اول شي
و قبل لا اسأل .. وين اولادك ما اشوفهم موجودين ولا
ريحانة : عيالي
... ؟؟؟
عبير : مسافرين
للدراسة و الثاني عمل
نوال : قصدج
تاركين امهم .. مب مسافرين
الصحفية : كيف
يعني
ريحانة : نوال
..البنت ياية تسوي لقاء صحفي عني انا و شغلي .. مب لازم نقول كل شي
نوال : يمكن انتو
الحين تشوفوني غلطانة بحق اختي اسماء بس انا يوم اشوف اللي نعانيه ما اقدر اسكت
لأنه ظلم و احس ان حقوقنا راحت .. و الساكت عن الحق شيطان اخرس
عبير : بس مب
وقته الحين .. اسفين اختي شوي معصبة على موضوع خاص
الصحفية : مو
مشكلة ممكن ازوركم وقت ثاني
ريحانة : ان قلتي
وقت ثاني بسجنج في هالبيت ..
نوال : انتي
صحفية و تمدحين نفسج و تقولين صحفية متميزة صح ..
الصحفية : صح ..
نوال : انزين ..
تعرفين هالفنانة القديرة .. و اللي تظن ان الناس للحين يتذكرونها هي و أكلاتها
تركوها اغلى الناس لها .. عيالها ..
الكبير اللي المفروض يكون عاقل صار مثل ابوه راعي منكر و سوالف فاضية و ترك البيت
لجل انسانة غريبة لا هي من اصلنا ولا هي من ديننا و الأصغر راح تزوج و كون له اسرة
و ترك امه بحجة انه بيكون اسرته لوحدة و يعلمه اصول الحياة .. كيف اصول الحياة و
هو اهم شي في الدنيا لاهي عنه .. ترك الجنة اللي تحت اقدام امه و راح يبني اسرة ..
كيف بيعلمهم .. و على شو بيعلمهم ؟؟
الصحفية : معقولة
في ناس بهالشكل ؟؟ !! و ليش يا مدام ريحانة .. ليش ساكتة و ما طالبتي برجوعهم
و تبدأ الصحفية
بكتابة ما تقوله ريحانة
ريحانة : لأنهم
تعلموا من ابوهم شي واحد .. امكم تكرهكم .. تتركم للخدم و تروح تسهر .. وانا اللي
بح صوتي و انا اغني و افرح غيري و اشوف الحسرة بحياتي .. كنت احترق من الدهن و
النار و أأكل غيري خوفي بس ان عيالي ينامون و بطونهم فاضية .. و اذا لقيت لي كم
فلس قام و خذاهم زوجي الله يرحمه .. و يصرفها على المنكر و الخرابيط .. حتى وصل
لمرحلة انه علم ولده الكبير طريق الحرام .. و انا حرمة جاهلة ما درست ولا تعلمت
تزوجت وانا عمري 13 سنة ما افهم شي بالحياة و عقوني بحضن ريال لا يخاف ربه ولا يحس .. ما امتهنت غير هالمهنة
اللي استرزق منها و الله لو اني اعرف اخيط جان خيطت ..
الصحفية : و انتي
يا نوال .. ربة اسرة .. سابقا" ..
نوال : يعني بكون
احسن من خالتي ريحانة .. اللي خلاني انفجر و اتكلم لأني انا نسخة منها نفس الحكاية بس الله رحمني ما عطاني عيال .. بس
يكفي اني كنت اعيش مع طفل كبير دمر لي حياتي .. ما يفرق عن زوج خالتي الا بشي واحد
بس.. انه عطاني حريتي بعد سنين من زواج فاشل بسبب صداقته بالوالد الله يرحمه و امي
المسكينة ماتت من حسرتها على حالي و حال اختها .. و شو الفايدة .. اسمي مطلقة و
الكل مستعر مني .. جرب شخص يخطبني مرة بس اهله وقفوا ضده لأنهم ما رضوا فيني ..
مطلقة .. يعني عيب .. يعني مجرمة بنظرهم .. ما يقولون يمكن مظلومة .. هي السبب ما
يقولون يمكن السبب زوجها ..
الصحفية :
الحمدلله على الاقل طلع ريال فيه الخير و تقدم لج .. و انتي يا عبير
عبير : انا شوا
قول .. ما اقول شي بس بديت اخاف .. ما ابي اعيش هالعيشة ابي اعتمد على نفسي ..
اكون مثل اختي اسماء
تخرج اسماء من
غرفتها ..
اسماء : تبين
تكونين مثلي انا ؟ تبين تكونين مثل مدرسة وصلت الثلاثين و هي تربي عيال غيرها ..
تخاف على الطالبات و كأنهم بناتها ترى انا احترق من داخلي .. بس حبي لكم يهون علي
كل شي .. نوال انتي تفكرين اني انا مب راضية نعيش برفاهية ؟؟ بالعكس بس والله احس
ان هالفلوس راح تفرقنا تبعدنا عن بعض .. ارفض لأني انانية في حبي لكم .. احبكم و
بعدها افكر في نفسي .. نوال و عبير .. انتو خواتي و بناتي في نفس الوقت .. خالتي
ريحانة ما قصرت تحسسنا انها امنا مافي يوم حسينا انها ثقيلة علينا .. مالنا غيرها
ومالها غيرنا .. شو يعني اعنس.. يمكن انا
عذري حبي لكم في بنات غيري عنسن بسبب اهاليهم و تعقدياتهم لا ما يخذها الا من نفس
القبيلة ما ياخذها الا الأبيض و ما ياخذها الا راعي الفلوس .. الا ولد عمها .. الا
ما اعرف منو .. و تم البنت و تكبر في العمر ليما تمل من الزواج و تعيش محرومة من
كلمة ماما ..
الصحفية : هذا
بيت واحد بس .. و لقيت فيه هالقصص .. لو امر على بيوت الفريج شو بلقى ؟
اسماء : ما راح
تلقين بيت مثل بيتنا .. بيت فيه حب و حنان و أمان
..
تقترب نوال من
اسماء و تحضنها و عبير تقترب منهم و تحضنهم بينما الصحفية تنظر اليهم و ريحانة
تنهض و تقترب ببطء
ريحانة : لازم
تبكوني .. يوم اقول عايلة مسلسل خليجي .. و انتي اكتبي ..
اسماء : اكتبي عن
حياتنا احسن خلي البنات يتعلمون منا اللي صابنا
نوال : اكتبي و
نحن ما نستحي .. ولا راح نتردد في نشر اسماءنا .. لأنه هذا واقع
عبير: اكتبي بس
بلييز تذكرين اني بوبو .. احلى ..
ريحانة : بوبو ..
ليش ما تنطمين احسن ..
تتوجه كل من
البنات الى غرفتها بينما تقف الصحفية في وسط الحوش و تنظر الى ما حولها و من ثم
تتصل
الصحفية : الوو
.. اسمع .. اول شي راح اغير المقالة و شوف لي مكان في قسم الحوارات والنقاشات بنزل
موضوع احسه راح يكسر الدنيا .. و اكتب عنوانه بالخط العريض
( بيت نصف
المجتمع ) و انا الحين ياية و معاي الخبر ..
و تخرج الصحفية
من المنزل
اظلامــ
ختام ـــ
ليست هناك تعليقات:
إرسال تعليق